Real Madril, Europako txapeldun hamalaugarren aldiz (0-1)

Real Madril Europako txapeldun bilakatu da hamalaugarren aldiz larunbat honetan, Liverpool mendean hartuta (0-1), Vinicius Juniorren golari esker, Parisko Stade de France futbol-zelaian jokatu den finalean.

Carlo Ancelottiren taldearen garaipenak defentsan egindako lan eskerga izan du oinarri, baina, batez ere, Thibaut Courtoisen geldiketa ugariak (atezain belgikarrak partidako jokalari onenaren aintzatespena jaso du). Courtoisen jarduna ezinbestekoa izan da madrildarrentzat partidari 0-0ekoarekin eusteko, Viniciusek (Fede Valverderen pasea baliatuta) garaipenaren gola lortu duen arte.

Horrela, Real Madrilek titulu berri bat gehitu dio Europan duen curriculum luzeari. Gaurkoarekin, bederatzi urteren buruan bereganatzen duen bosgarren Txapeldunen Liga da, bere historiako hamalaugarrena, hain zuzen ere (1956, 1957, 1958, 1959, 1960, 1966, 1998, 2000, 2002, 2014, 2016, 2017, 2018 eta 2022).

FITXA TEKNIKOA:

0 - Liverpool: Alisson; Alexander-Arnold, Van Dijk, Konaté, Robertson; Fabinho, Thiago (Firmino, 77. min), Henderson (Keïta, 77. min); Salah, Mané eta Luis Díaz (Diogo Jota, 65. min).

1 - Real Madril: Courtois; Carvajal, Alaba, Militao, Mendy; Casemiro, Kroos, Modric (Ceballos, 90. min), Fede Valverde (Camavinga, 85. min); Vinícius (Rodrygo, 92. min) eta Benzema.

Golak: 0-1, 59. min: Vinícius.

Epailea: Clément Turpin (FRA). Txartel horiak: Fabinho (Liverpool).

Gertaerak: Parisko Stade de France zelaian jokatutako Txapeldunen Ligako finala, 78.000 ikusleren aurrean. Neurketaren hasiera 37 minutu atzeratu da, sarrerarik gabeko ehunka zalek segurtasun arazoak eragin baitituzte.