Saskibaloia
Palau Sant Jordi kantxan
Real Madrilek Errege Kopa irabazi egin du Bartzelona jipoituta
Erredakzioa
Pablo Lasoren mutilek 74-91 gainditu dute Bartzelona Errege Kopako finalean. Sergio Llul (23 puntu) eta Jaycee Carroll (22 puntu) izan dira partidako jokalari onenak.
-
Bartzelona-Real Madrid. Argazkia: EFE
- Fitxa teknikoa:
74 - Bartzelona (17+16+23+18): Huertas (2), Mickeal (10), Eidson (5), Lorbek (15), N'Dong (19) -hasierako bostekoa-, Sada (-), Navarro (16), Vazquez (2), Wallace (-), Ingles (-) eta Rabaseda (5).
91 - Real Madril (22+20+23+26): Llull (23), Singler (4), Suarez (9), Mirotic (9), Tomic (2) -hasierako bostekoa-, Begic (10), Rodriguez (2), Pocius (6), Reyes (2), Carroll (22), Velickovic (2) eta Sanz (-).
Pablo Laso arabarrak zuzendutako Real Madrilek irabazi du saksibaloiko Errege Kopa Bartzelona 74-91 gaindituta. Talde zuriak 23. Kopa lortu du Palau Sant Jordin jokatutako edizioan.
Pablo Lasoren taldea indartsu irten da Palau Sant Jordiko kantxara eta Sergio Llulek ederki gidatu du Real Madrilen erasoa (8-12). Zuriek saskiraketa errazak lortu dituzte eta Kyle Singler estatubatuarrak 17-22koa jarri du markagailuan aurreneko laurdeneko azken segundoan.
Bigarren laurdenean Madrileko taldeak abantaila handitu egin du markagailuan, batez ere, Carlos Suarezek lortutako puntuei esker. Bartzelona ez da eroso egon kantxan eta erasoko erreferentzia bakarra Boniface Ndong izan dute Xavi Pascualen mutilek. Lasoren taldeak 11 puntuko aldea lortu du Reyesen saskiraketa bati esker (25-36), baina atsedenaldira 33-42koa markagailuarekin joan dira bi taldeak.
Atsedenaldiaren ostean etorri da Bartzelonaren erantzuna Erazem Lorbekek eta Juan Carlos Navarrok puntu erabakigarriak lortu baitituzte markagailua estutzeko (51-52). Hala ere, Pablo Lasok Jaycee Carroll kantxaratu du eta jokalari zuriak 51-58ko ezarri du markagailuan. Xavi Pascualen taldea noraezean ibili da eta Real Madrilek 56-65ekoa jartzeko aprobetxatu du.
Azkenengo laurdenean Jaycee Carrollek erakustaldia eman du erasoan eta Pablo Lasoren taldeak 17 puntuko aldea lortu du (56-73). Bartzelona Regal taldeari aldapa gora jarri zaio norgehiagoka eta Real Madrilek joko bikaina erakutsi du Palau Sant Jordiko kantxan. Azken emaitza 72-91koa izan da eta Real Madrilek 23. Errege Kopa eskuratu du.
