Espainiako Gobernuak Donostia 2016rekiko kezka agertu dio Europari

Espainiako Gobernua Europako Batzordeari zuzendu zaio, Donostia 2016 Europako Kultura Hiriburuaren Fundazioko patronatuaren "profesionaltasunik, gardentasunik eta gainerako erakundeekiko leialtasunik eza" dela eta kezka agertzeko eta proiektua une "kritikoan" dagoela adierazteko.

Jose Maria Lasalle Kulturako Espainiako Estatu idazkaria mintzatu da horrela, Kongresuan, Kultura Batzordean, Itziar Nogeras zuzendari nagusiak dimisioa eman, Itziar Elizondo Komunikazio zuzendariak kargua utzi eta Guadalupe Echevarria kultura arduraduna kargutik kendu eta gero Fundazioaren egoera balioztatzeko orduan.

"Donostiak ez du gertatzen ari dena merezi", esan du Estatu idazkariak, eta proiektuaren "kudeaketa txarra hiriaren, Euskadiren eta Espainia osoaren irudi ona" arriskuan jartzen ari dela gaineratu du.

Odon Elorza diputatu sozialistak egindako galderari erantzunez, Lasallek "zuzendaritza taldekoen profesionaltasunik eza eta proiektuaren ikuspegi lokalista" aldatzeko eskatu du, egitasmoa zuzen garatze aldera, eta "Fundazioaren osaeran dagoen desoreka" bukatu egin behar dela esan du. Hain zuzen ere, desoreka horrek ez dio, Lasalleren esanetan, Hezkuntza, Kultura eta Kirol Ministerioari proiektua bertatik bertara jarraitzen uzten eta zuzendaritza taldearekin lankidetzan aritzen.

Egoera horren aurrean, Gobernuak kudeaketa mailan soilik aritzeko eskatu dio Fundazioaren taldeari, eta egungo krisia sortu duten arrazoien inguruan hausnarketa egin arte zuzendari gehiagorik ez izendatzeko gomendatu dio, "egitura mailako akatsak konpondu ahal izateko".

Bestalde, kritikatzeaz gain konponbideak proposatzea eskatu dio Elorzak Estatu idazkariari, eta Parlamentuan sozialistek duten taldearen laguntza eskaini du horretarako.