Giro egonkorra astean zehar, eta euri txikia astelehenerako

Astearen hasieran fronte bat izango dugu gurean, Euskalmet Euskal Meteorologia Agentziaren arabera. Astelehenean, iparraldean espero da eguraldirik txarrena eta egunaren lehenengo partean zerua estalia egongo da, eta zaparradak botako ditu han-hemenka. Arratsaldean, ordea, hobetzera egingo du edonon. Tenperaturan ez da aldaketa handirik espero.

Astearteak joera berdinari eutsiko dio. Egunaren lehenengo partean hodeiak ugariak izango dira oraindik eta kantaurialdean baliteke zirimiria egitea. Eguna aurrera joan heinean, hodeiak desagertuko dira eta eguzkia gailenduko da zeruan. Tenperaturari dagokionez, termometroak gora egingo du, eta maximoak gradu pare bat altuagoak izango dira.

Asteazkenetik aurrera, joeraren arabera, giro egonkorrari eutsiko diogu, eta tenperaturak ez du aldaketarik jasango.