Lainoek zirimiria ekarri dute

Zeru urdineko eta giro epeleko astea ez da ondo bukatuko, izan ere, gaur tenperaturak behera egin du eta zerua lainoz josi da, Euskalmetek iragarri duenez.

Tenperaturak nabarmen behera egingo du gaur eta zeru-gainean hodeiak nagusituko dira ipar partean. Itsasaldeko haizearekin freskatu egingo du, eta eguneko tenperatura beroenak asko jaitsiko dira; atzoko balioekin alderatuz 10 ºC baxuago geldituko dira hainbat zonaldetan. Zeru goibelarekin argituko du egunak eta tarteka euri txikia egingo du. Araba hegoaldean eta Nafarroan, Iruñerritik behera, hodeiak eta urdinguneak tartekatuko dira.

Iparraldeko haizearekin, ildo beretik jarraituko dugu bihar. Ipar partean zerua estalita agertuko da eta tarteka euri arina egingo du. Lurraldearen hegoaldean aldiz, tantaren bat edo euri langar pixka bat egin dezake, baina oro har, hodei eta ostarteak tartekatuko dira. Ipar-mendebaldeko haize freskoarekin, eguneko tenperatura beroenak 18 ºC-ko muga nekez gaindituko dute.

Ipar-mendebaldeko haizea ahuldu eta hodeitza arinduz joango da asteartean; kantauri isurialdean hodeiak erabat desagertuko ez badira ere, urdingune politak irekiz joango dira. Araba eta Nafarroan, ostarte zabalak nagusituko dira. Termometroak 15-18 ºC-ren artean mugituko dira arratsaldeko lehen orduetan.

Asteazkenetik aurrera, tenperaturak pixkanaka gora egingo du eta zeruak ere garbitzera joko du, beraz, asteak aurrera egin ahala, eguraldiak hobera egingo du.

Kontsulta ezazu eguraldiaren iragarpena eitb.com-en eta goza ezazu argazki politenekin eguraldiblog-en.