Larunbata hodeiekin hasiko den arren, argi samar amaituko da

Gaur hodeiak ugaritu egingo diren arren, giro atsegina nagusituko da. Hodeiak eta urdinguneak tartekatuko dira baina goizean eta azken orduetan hodeiak izango dira nagusi, Euskalmet Euskal Meteorologia Agentziaren arabera. Eguerdian eta arratsaldean aldiz, ostarteak gailenduko dira. Iparraldeko haizeak ahul joko du eta tenperatura maximoak ostiralekoak baino gradu 1 edo 2 ºC baxuagoak izango dira.

Igande eguzkitsua espero dugu. Goizean behe-hodei batzuk egon daitezke, baina azkar desegingo dira. Gainontzeko orduak eguzkipean igaroko ditugu eta kostaldean izan ezik, gainontzeko lekuetan termometroak erraz gaindituko du 25 ºC-ren muga. Arabar Errioxan eta Nafarroa hegoaldean 30-32 ºC-ra iritsiko dira.

Egoera aldatu eta eguraldiak euritara joko du astelehen arratsaldetik aurrera. Hori bai, ordura arte, giro atsegina izango dugu eta eguerdi partean termometroa 27 ºC-ra inguratuko da. Egunak aurrera egin ahala, hego-mendebaldetik, euria dakarten hodeiak ugarituko dira eta zaparrada trumoitsuak nonahi botako ditu. Zenbait bazterretan mardulak izan daitezke. Arratsaldean haizeak hegoaldetik iparraldera egingo du eta euriarekin batera tenperatura jaitsaraziko dute.