Iñigo Urkulluk egonkortasunaren aldeko apustua berretsi du

Iñigo Urkullu EAJren lehendakarigaiak azpimarratu du egonkortasuna dela bere lehentasunetako bat, "konfiantza, inbertsioa eta hazkundea" sustatzeko ezinbesteko baldintza delako, bere iritzian, industrian, enpleguan eta ekonomia errealean.

Urkulluk Bombardier multinazionalak Trapagaranen duen lantegia bisitatu du gaur goizean, Arantxa Tapia Eusko Jaurlaritzako Ekonomiaren Garapen eta Lehiakortasuneko sailburua lagun zuela.

Konpainiako zuzendaritzako kideekin bilera egin eta lantegira bisita egin aurretik, atzoko hauteskundeen ondoren hiru ideia azpimarratu nahi izan ditu: egonkortasuna, industria eta enplegua.

Egonkortasunarekiko apustuari eutsi ostean, Urkulluk adierazi du beraien eredua erakundeen arteko lankidetza eta publikoaren eta pribatuaren arteko ituna dituela oinarri. "Egonkortasuna bermatzen duen eredu honekin konprometituta gaude. Gainera, ezinbesteko baldintza da konfiantza, inbertsioa eta hazkundea sustatzeko".

Halaber, Euskadik industriaren eta ekonomia errealaren aldeko "apustua" egiten duela berretsi du eta, ildo horretan, Eusko Jaurlaritzak teknologia, berrikuntza eta nazioartekotze alorrean industria babesten jarraituko duela adierazi du.

Bestalde, Urkulluk nabarmendu du egonkortasuna eta ekonomia errealari babesa direla hazten jarraitzeko eta lan aukerak sortzeko oinarriak.