PP EAJrekin itunak egiteko prest dago, ekonomia eta enplegu gaietan

Nerea Llanos Euskadiko PPren idazkari nagusiak esan du bere alderdiak "EAJren alternatiba" izan nahi duela, baina “beti” egongo direla prest jeltzaleekin akordioak egiteko, ekonomiaren hazkundea lortzeko eta enplegua sortzeko bada.

“Ez dugu arazorik izango gehitzeko, integratzeko eta aurrera egiteko politiketan, herritarrei interesatzen zaizkien gaietan, krisia gainditzeko edo enplegua sortzeko gaietan, adibidez, akordioetara heltzeko; horretarako bada, hor egongo gara; nortasunari lotutako gaietan, berriz, ez”, azaldu du.

Estatuko egoera politikoari dagokionez, Nerea Llanosek jarrera alda dezala eskatu dio EAJri, “blokeoa amaitzeko, Mariano Rajoyren inbestidura ahalbidetzeko eta Espainian Gobernuan osatzeko”.

“EAJk jakin beharko luke Espainiaren egonkortasuna Euskadirentzat mesedegarria dela eta hirugarren hauteskundeak deitzea inork ez duela nahi, ezta euskal herritarrek ere”, gaineratu du.

Bestalde, Alfonso Alonso Euskadiko PPren presidenteak Espainiako Diputatuen Kongresuan duen eserlekua utziko du, Gasteizko Ganberan legebiltzarkide izateko. Madrileko Beheko Ganberan utziko duen lekua Javier Marotok hartuko du.

Ildo horretan, Llanosek esan du atzo PPk lortu zituen emaitzak “Alfonso Alonsok zuzenduko duen epe luzerako proiektuaren abiapuntua” direla, “eta ez helburua”. Horrenbestez, segurutzat jotzen zuen Alonsok Kongresua utziko zuela Legebiltzarrean lan egiteko.