Udal eta foru hauteskundeak -
Kanpainaurrea
PSE "ezinbestekoa" dela aldarrikatu du Anduezak, "oreka" delako
Euskal Sozialisten Batzorde Nazionalean euskal sozialisten idazkari nagusiak adierazi duenez, "PSEk zirikatzen du, gauzen norabidea aldatzen duelako eta ez delako isiltzen".
AGENTZIAK | EITB MEDIA
Eneko Andueza PSE-EEko idazkari nagusiak aldarrikatu duenez, PSE "ezinbestekoa da Euskadin, oreka ordezkatzen" duelako. Anduezaren hitzetan, PSE barik, "subiranotasunean eroriko ginateke, eta esparru sozialean irabazitakoren parte bat galduko genuke". Zentzu horretan, "PSEk zirikatzen du, gauzen norabidea aldatzen duelako eta ez delako isiltzen". "Ez gara isilko eta ez diogu zirikatzeari utziko", ohartarazi du.
Larunbat honetan Bilbon izandako Euskal Sozialisten Batzorde Nazionalean egin ditu Anduezak adierazpen horiek. Maiatzaren 28an izango diren udal eta foru hauteskundeetarako zerrendak berresteko bildu dira EAEko sozialistak.
Anduezak azpimarratu duenez, sozialistak garrantzitsuak dira politika progresistak garatzeko, "gu gabe, ez liratekeelako errealitate bihurtuko". "Oreka gara, gu barik, Euskadi subiranotasunean eroriko litzateke, eta esparru sozialean irabazitakoren parte bat galduko genuke", gaineratu du.