Goizak gaur
Elkarrekin-Podemos
Gorrotxategi: "Hezkuntza legerako akordioan alderdien arteko adostasun zabala lortzeko lanean ari gara"
Garazi Urdanpilleta | EITb Media
Miren Gorrotxategi Elkarrekin-Podemos-IU Legebiltzarreko taldearen bozeramaileak adierazi duenez, sindikatuek eskatutako neurriak hezkuntza lege berriaren akordioan txertatzea espero dute.
-
Miren Gorrotxategi
4:36 min
Elkarrekin Podemos-IU (EP-IU) taldeak Eusko Jaurlaritza osatzen duten bi alderdiekin (EAJ eta PSE-EE) Hezkuntza Legearen oinarrien inguruan aurreakordioa lortu duela iragarri berritan, Miren Gorrotxategi bozeramaileak nabarmendu du aurreakordioa akordio bihurtzeko asmo sendoa dutela, eta EAJ, PSE, EH Bildu eta Elkarrekin Podemos-IUren artean adostasun zabala lortzeko "jo eta ke lanean" direla.
Halaber, Hezkuntzan nagusi diren sindikatuek martxoaren 25erako iragarritako greba deialdiaren aurrean, Gorrotxategi itxaropentsu agertu da "sindikatuek eskatzen dituzten neurriak akordio horretan txertatzeko".
EP-IUk lortutako aurreakordioarekin pozik da taldearen bozeramailea, haren arabera, kontzertazio unibertsalarekin amaituko delako: "Ikastetxeei exijituko zaie, diru publikoa jaso nahi badute, zenbait ezaugarri betetzea segregazioaren eta diskriminazioaren kontra". Gorrotxategik dio ezaugarri horiek zein izango diren zehaztu gabe dagoela, bai, ordea, zein printzipiori erantzungo dieten, eta Legebiltzarrak esku hartuko duela ezaugarrien katalogo hori egokia izan dadin.
Azkenik, matrikulazioaz herri bakoitzeko udal bulegoak arduratzeak ikasleak aukeratzeko bidea moztu, eta esleitze prozesu neutral eta objektiboa bermatzeko balioko duela azpimarratu du.
