Llorente: 'Salbazioa lortu eta gauzak lasai uzteko gogoa daukat'

Fernando Llorente Athleticeko aurrelariak esan du udan Athletic utzi eta Juventusera joan baino lehen, talde zuri-gorriak salbazioa lortzea dela bere helburu nagusia.

"Ez zaigu asko falta. Denboraldia apur bat okertu zaigu. Taldeari laguntzeko gogoa daukat, salbazioa lehenbailehen lortu eta gauzak lasai uzteko", esan zuen Madrilen, ongintzazko ekitaldi batean.

"Oso ondo gaude. Azken partidetan taldea oso sasoi onean ikusten dut, partida onak egiten ari gara baina nahi dugun etekina atera gabe. Garaipena merezi izan dugu, baina azken metroetan ez dugu asmatu eta ezin izan dugu garaipenik lortu", gaineratu du.

Aurten bizi duen egoerari dagokionez, "alde positiboari erreparatu" behar zaiola esan du. "Bizitzan gauzak zerbaitegatik gertatzen dira eta gertatutakoa etorkizunean lagungarri izango zait".

Juventus

Juventusen inguruan ere hitz egin du: "Europako onenetarikoa da eta azken bi urteetan Italiako onena izan da. Oraindik ez dut denborarik izan hara joan eta lekua ikusteko. Denboraldia amaitzean joango naiz. Oso pozik nago. Niretzat oso garrantzitsua da etorkizunean datorkidana. Baina orain Athletic bakarrik dut buruan".