Athletic Club
BBVA Liga
Valverde, urtarrilako entrenatzaile onena
Erredakzioa
Espainiako Futbol Liga Profesionalak martxoaren 5ean emango dio saria Athleticeko entrenatzaileari Lezamako kirol instalazioetan.
-
Ernesto Valverde. Argazkia: EFE
Ernesto Valverde BBVA Ligako urtarrilako entrenatzaile onena izendatu du Futbol Liga Profesionalak. Saria martxoaren 5ean emango diote Lezamako kirol instalazioetan.
Athleticek galdu egin zuen urtarrilaren 5ean Anoetan jokatu zuen Realaren aurkako derbia (2-0), baina ondoren, Almeria (6-1), Valladolid (4-2) eta Osasuna (1-5) jipoitu zituen.
Talde zuri-gorriak bana (1-1) berdindu zuen Real Madrilen aurka igandean eta 22 jardunalditan 43 puntu lortu ditu. BBVA Ligako sailkapeneko laugarren postuan dago Athletic, Txapeldunen Liga jokatzea bermatzen duen postuetan, eta bosgarren sailkatua den Vila-reali hiru puntu ateratzen dizkio.
