Athletic Club
Adierazpenak
Beñat: 'Sentsazioak onak dira, bide honetatik egin behar dugu aurrera'
ERREDAKZIOA
Arratiarraren ustez, datorren partida da beti helburua, eta "ez sailkapeneko goiko eta beheko postuei etengabe begira egotea".
Beñat Etxebarria Athleticeko jokalariaren ustez, azken lau jardunbaldietan lortu dituzten zortzi puntuez gain, sentsazioak ere onak dira eta, beraz, jarraitu beharreko bidea hori da.
“Datorren partida dugu beti helburu, eta ez sailkapeneko goiko eta beheko postuei etengabe begira egotea”, adierazi du Beñatek Lezaman egindako lan-saioan parte hartu ondoren.
“Txapeldunen Ligan hirugarren postua eskuratzea lortzen badugu, eta Europa Ligan jokatzeko aukera baldin badugu, ederto, baina gure helburu nagusia Liga izan behar da, berak ematen baitigu dena”, esan du bizkaitarrak, eta Athleticek txapelketa guztiei aurre egiteko jokalari gabeziarik ez duela azpimarratu du.
Azkenik, bere egoeraz arituta, “indartsu eta konfiantzarekin” dagoela azaldu du Beñatek, Valverderen hamaikakoetan nekez sartzen bada ere.
“Aurkari bakoitzak era batera edo bestera jokatzea eskatzen du, eta entrenatzaileak, horren arabera, erdilari bat edo beste aukeratzen du”, gaineratu du Athleticeko jokalariak.
