Athletic-Valladolid: Irabazi, amets egiteko

Liga amaitzeko heren bat falta denean mailari eusteko behar diren ia puntu guztiak poltsikoan izatea lorpen handia da sasoi hasieran helburu nagusi mailari eustea daukan talde batentzat. Ba, Athletic egoera horretan dago. Horregatik, txipa aldatu eta jokalariak ere hasi dira Europan jokatzeko aukera ematen duten txartelaren bila. Caparros da guztietan baikorrena. "Txapeldunen Ligarako txartela eskuratzeko aukera daukagula esatea ez da astakeria. Orain arte eskuratu ditugun puntuek aukera hori ematen digute", esan du teknikariak.

Ametsa egi bihurtzeko, etxeko partidetan ezin dela huts egin uste du entrenatzaileak. Gaur Valladolidek bisitatuko du Katedrala. Onesimoak zuzentzen duen taldea estu eta larri ari da. Sasoi amaierara bitartean lan ona egin beharko du Lehen Mailan jarraitu gura badu. Baina Athleticek ez dio egoerari buelta ematen hasteko behar dituen puntuak oparitu gura.

Yeste deialditik kanpo bigarrenez jarraian

Caparrosek emandako deialdian badago ustekabekorik. Besteak beste, joan den jardunaldian hasieratik aritu ziren Iturraspe eta De Marcos zerrendatik kanpo geratu dira. Baita Fran Yeste ere. Basauritarra bigarrenez jarraian geratu da kanpoan. Bestalde, Orbaiz eta Muniain dira berritasunak. Castillo ere osatu da eta prest dago taldeari laguntzeko.

San Mames
Mateu Lahoz
19:00 horas

Athletic: Iraizoz; Iraola, San Jose, Amorebieta, Castillo; Gurpegi, Javi Martinez, Orbaiz, Gabilondo; Toquero eta Llorente.