Denboraldiko lehen puntua lortu dute gorritxoek Nafarroako Erresuman

Fitxa teknikoa:

Osasuna: Andres Fernandez; Marc Bertran, Lolo, Miguel Flaño, Damia; Oier Sanjurjo, Timor; Cejudo (Nino, 85. minutua), Armenteros (Kike Sola, 57. minutua), Sisi (Lamah, 68. minutua); eta Llorente.

Mallorca: Aouate; Ximo (Arizmendi, 73. minutua), Nunes, Conceiçao, Antonio Lopez; Pereira, Pina (Joao Victor, 66. minutua), Marquez, Nsue; Alfaro (Geromel, 42. minutua) eta Hemed.

Golak: 1-0, 69. minutua: Kike Sola. 1-1, 78. minutua: Hemed.

Osasunak bizi hasi du norgehiagoka eta Mallorca mendean izan du aurreneko minutuetan. Hala ere, gorritxoek ez dute hasiera ona aprobetxatu markagailuan aurrea hartzeko eta Mallorcak neurketa parekatu du minutuek aurrera egin ahala.

Horrela, Joseba Llorentek eta Sisik bi abagune izan dituzte aurreneko 20 minutuetan, baina biek kale egin dute errematean. Jarraian Joaquin Caparrosen jokalariek arriskua sortu dute Andres Fernandezen atean. Alfaroren burukada bat gelditu behar izan du atezain gorritxoak.

Atsedenaldiaren atarian lehen zatiko jokaldi polemikoa jazo da Mallorcaren area barruan. Llorentek ukondokada eman dio Nunesi, baina epaileak bien arteko tirabira izan dela interpretatu eta bi jokalariak egotzi ditu.

Atsedenaldia baino lehen Cejudok aukera izan du, baina area barruan egindako jaurtiketa Aouatek aldaratu du.

Bigarren zatia aurrenekoa bezala hasi da. Hau da, Osasuna agintzen hasi da, baina lehen zatian ez bezala, nagusitasuna isla izan du markagailuan. Mendilibarrek Lamah eta Kike Sola berdeguneratu ditu. Lamaheren erdiraketa bat lehen zutoinean sare barrura bidali du Solak 69. minutuan.

Nafarroako Erresumaren pozak hamar bat mnutuko iraupena izan du. Mallorcak erasora jo eta berdinketa lortu du geldikako jokaldi batean. Hemedek buruz baloia sareetan kokatu du 78. minutuan. Golak Mallorca suspertu du eta Joao Victorrek baloia zutoinera bidali du gutxi geroago.