Florentino Perez: 'Cristianok akordiorik onena izatea nahi dut'

Florentino Perez Real Madrileko presidenteak talde zuriaren etorkizuna Cristiano Ronaldoren inguruan eraiki nahi duela adierazi du. Horrela, portugaldarrak akordioa berritu ondoren munduan gehien kobratzen duen jokalaria bilakatzea nahi duela, onartu du.

Real Madrilek akordioa berritu nahi dio Cristiano Ronaldori. Jokalariak triste zegoela adierazi zuen, denboraldi hasieran, eta Florentino Perezek akordioa berritu nahi diola azaldu du, Ser irratian.

"Real Madrilen etorkizuna Cristianoren inguruan eraiki nahi dut. Cristiano Ronaldo munduan gehien kobratzen duen jokalaria bilakatzea nahi dut. Lau urte hauetan lan bikaina egin du, Casillasekin, Mourinhorekin, guztiekin. Ez du inolako arazorik izan klubarekin", esan du presidenteak.

"Cristianok triste zegoela esan zidan, eta pozik egoteko gure esku zegoen guztia egingo genuela zin egin nion, munduko jokalaririk onena baita. Ez dakit PSGk eskaintza egin zion edo ez. Une txarra igaro zuen, eta ez zen ezer gertatu. Ondoren, lan izugarria egin du. Ni ere noizbehinka triste egoten naiz", azaldu du Florentino Perezek.