Bartzelonak Klasikoa irabazi du Real Madril jipoituta

Bartzelonak 5-1 irabazi dio Real Madrili Camp Noun igande honetan jokatu den Klasikoa. Luis Suarez izan da partidako izarra, aurrelari uruguaiarrak hat-tricka lortu baitu, 3 gol sartuta.

Barçak hasieratik izan du baloiaren jabetza, eta arrisku-sentsazioa sortu duen arren, kosta egin zaio abagune argiak sortzea. Real Madrilek izan du neurketako lehen abagunea, baina Benzemaren jaurtiketa gora joan da. Bartzelonak zuloa ikusi du ezker hegaletik, Nacho egon den aldetik, Bale ez baita jokaldi askotan jaitsi laguntza egiten. Halako baten, 11. minutuan, Jordi Albak ezker hegaletik sartu da, pasea atzera eman, eta Coutinhok 1-0ekoa sartu du, baloia sare barrura bidalita. Marcelo saiatu da area kanpotik Ter Stegen gainditzen, baina Bartzelonako atezainak ondo erantzun du. Barçak beste abagune argi bat izan du 19. minutuan, eta Courtoisek eragotzi du gola, Arthurren jaurtiketa bikainari erantzun ezin hobea emanda. Lehen zatiko jokaldi polemikoa 28. minutuan iritsi da; Luis Suarez lurrera erori da Varanerekin area barruan izan duen lehian, eta epaileak penaltia adierazi du bideo-arbitraje laguntzailea kontsultatu ostean. Luis Suarezek egin du 2-0ekoa, penaltiz. Atsedenaldira iritsi aurreko azken ordu laurdenean, parekatu egin da partida, baina Bartzelonak abagune argia izan du 43. minutuan, nahiz eta Piquek ez duen errematea egiterakoan asmatu.

Bigarren zatiari erasokor ekin dio Real Madrilek, Bartzelona atzean sartzea lortu du, eta aldeak murriztea lortu du Marcelok 50. minutuan sartu duen golari esker (2-1). Sei minutu beranduago, Modricen jaurtiketak zutoina jo du, eta ez da gutxigatik sartu. Bartzelonaren erantzuna 62. minutuan etorri da Luis Suarezek zutoinera bidali duen erremate batekin. Ondorengo minutuetan parekotasuna izan da nagusi. Real Madril hobea izan da bigarren zatian, baina Bartzelonak partida erabakita utzi du 75. minutuan, Sergi Robertok erdiratu eta Luis Suarezek bikain errematatuta sartu du 3-1ekoa. Gol horrek Real Madrilen esperantzak murriztu egin ditu, eta Sergio Ramosek 83. minutuan egin duen huts larri baten ostean, Luis Suarez bakarrik geratu da Courtois atezainaren aurrean eta 4-1ekoa sartu du. Azken txanpan, erasora jo du Barçak eta Arturo Vidalek biribildu du talde blaugranaren festa, 5-1ekoa sartuta.

Fitxa teknikoa:

5 - Bartzelona: Ter Stegen; Sergi Roberto, Pique, Lenglet, Alba; Sergio Busquets, Rakitic, Arthur (Arturo Vidal, 84. min); Rafinha (Semedo, 68. min), Suarez eta Coutinho (Dembele, 74. min).

1 - Real Madril: Courtois; Nacho, Sergio Ramos, Varane (Lucas Vazquez, 46. min), Marcelo (Mariano, 82. min); Casemiro, Kroos, Modric, Isco; Bale (Asensio, 77. min) eta Benzema.

Golak: 1-0, 11. min: Coutinho. 2-0, 30. min: Luis Suarez, penaltiz. 2-1, 50. min: Marcelo. 3-1, 75. min: Luis Suárez. 4-1, 83. min: Luis Suarez. 5-1, 87. min: Arturo Vidal.

Epailea: Jose Maria Sanchez Martinez. Txartel horiak atera dizkie Rakitic (38. min), Nacho (39. min), Bale (53. min) eta Luis Suarez (77. min) jokalariei.