Lasarte (Salamanca-Reala): "Ondo jokatuko dugulako susmoa dut"

Salamancako lehiaren testuingurua txuri-urdinen aldekoa dela dirudi. Bata, gora begira jarrita dago, helburu mamitsua lortzeko borrokan. Bestea aldiz, ur handitan sartu da beherantza nabarmen egin eta gero. Harmailetan gainera, 2 000 realzaletik gora espero da. Horren inguruan galdetuta, "zaleen babesa sentitzea garrantzitsua da jokalarientzat. Ez zait iruditzen irabazteko presioa areagotzen duenik horrek, kontrakoa. Onuragarria zaigu", erantzun du uruguaitarrak.

Zuhurtziaz busti ohi ditu bere hitzak Lasartek eta gaur lasaitasun mezua zabaldu nahi izan du sor litekeen antsietatea sahiesteko. "Errealitateari men eginaz, bide onetik goazela esan genezake. Hala ere, ez dago deus erabakita. Joan den astean, zalantzak izan ziren nagusi, ezbaian zegoen guztia. Aste honetan, berriz, egoerak argigarriagoa dirudi. Horrela izango da. Neurketak jokatu egin behar ditugu eta kito".

Salamancara bidaiatu baino lehen, norgehiagoka aurreko azken saioa burutuko dute bihar goizean txuri-urdinek Zubietan. Ondoren emango du deialdiaren berri.