Bartzelona eta Atletico Madril Txapeldunen Ligatik at geratu dira

Bartzelonak agur esan dio Txapeldunen Ligari. Asteazken honetan (urriak 26) Inter Milanek Viktoria Plzenen aurka lortu duen garaipenak (4-0) aurrera egiteko aukera gabe uzi du Kataluniako taldea; gainera, Barçak galdu egin du Bayern Munichen kontra (0-2).

Inter aise nagusitu da Plzenen aurka, 4-0eko emaitzarekin, etxean jokatu duen multzoen faseko 5. jardunaldiko neurketan. Mkhitaryan, Dzeko (x2) eta Lukaku izan dira golegileak. Horrenbestez, Interrek final-zortzirenetarako txartela bereganatu du, eta Bartzelona Europa Ligan lehiatuko da.

Atletico Madril ere kanporatuta geratu da Xabi Alonsok zuzentzen duen Bayer Leverkusenekin berdindu ostean (2-2) Metropolitano estadioan. Portok irabazi egin dio final-zortzirenetarako sailkatuta dagoen Brujasi (0-4); ondorioz, Portok hurrengo faserako txartela eskuratu du.

A multzoan Liverpoolek bermatu egin du final-zortzirenetarako sailkapena Ajaxi 0 eta 3 irabazita. Bestalde, jada final-zortzirenetarako txartela ziurtatuta zuen Napolik mendean hartu du Rangers (3-0) eta bostetik bost partida irabazi ditu.

Azken jardunaldia erabakigarria izango da D multzoan. Tottenhamek eta Sporting Lisboak berdindu egin dute (1-1), eta Eintracht Frankfurtek irabazi egin dio Olympique Marsellari (2-1). Lau taldeek dute aukera final-zortzirenetara sailkatzeko. Tottenham da liderra 8 punturekin, Sportingek eta Eintracht Frankfurtek 7na puntu dituzte, eta 6 puntu ditu Olympique Marsellak.