Arrauna
San Miguel Liga
TKEk ez du positiborik antzeman 103 kontroletan
Erredakzioa
EPOrh hautemateko 22 kontrol egin dituzte, CERA detektatzeko beste 12 eta hemoglobina sintetikoak aurkitzeko bi.
-
Argazkia: EFE
Traineru Kluben Elkarteak (TKE) dopinaren aurkako 103 kontrol egin ditu 2012 denboraldian zehar. "Legez kanpoko substantzia edo metodorik erabili ez" dela demostratu dute laborategian egindako kontrolek, TKEren arabera.
Gaur argitaratutako komunikatuan, San Miguel Ligako hamabi traineruak biltzen dituen erakundeak 103 kontrolak azaldu ditu. Dopinaren aurkako kontrol horietatik 55 "lehiaketan" egin ziren eta beste 48 "lehiaketatik at".
Azterketa horietan "EPOrh hautemateko 22 kontrol berezi egin dituzte, CERA detektatzeko beste 12 odol lagin fisiologiko bildu dira eta aurten nobedade bezala, hemoglobina sintetikoak aurkitzeko bi kontrol egin dituzte".
102 odol lagin
Dopinaren kontroletaz gain, denboraldian arraunlarien 102 odol lagin bildu ditu elkarteak "parametro hematologikoak" aztertzeko; izan ere, "dopinak sortutako aldaketak antzematea posible zen".
"Odolean egindako azterketek ez dute dopin substantzien erabilpenik hauteman", azpimarratu du TKEk.
