Daimler fabrikatzaileak 41 milioi euro inbertituko ditu Gasteizen

Daimler automobilak egiten dituen fabrikatzaile alemaniarrak 41 milioi euro inbertituko ditu aurten Mercedes-Benzek Gasteizen duen egoitzan. Erabaki horren helburua V Klasea eta Vito modeloen produkzioa handitzea izango da, ohar baten bitartez iragarri dutenez.

Halaber, lehenengo lauhilekoan Vito ibilgailuaren salmentak % 61 igo dira, eta, guztira, modelo horren 21.300 auto saldu dituzte. V Klaseko modeloari dagokionez, berriz, igoera % 58koa izan da eta aztertutako epe horretan 9.300 ibilgailu saldu dituzte.

Gasteizen inbertituko duten diruaren kopuru gehiena karrozeria eta pinturako lanak egiteko bideratuta egongo da. Gainera, aurten egingo duten inbertsioak igoera nabaria suposatzen du 2015ean egin zutenarekin alderatuz.

Era berean, urrian beste lan-txanda bat gehituko dute aurretik aipatutako bi modelo horien produkzioa handitzeko asmoz.