LABek eta ELAk Toñaren dimisioa eskatu dute, 'sabotajea' egiteagatik

ELA eta LAB sindikatuek Angel Toña Enplegu sailburuaren dimisioa eskatu dute, Eusko Jaurlaritzak Elkarrizketa Sozialerako Mahaiari helarazi dion proposamenean euskal gehiengo sindikalari "saboteajea" egitea proposatzen dela iritzita.

Sindikatuek azaldu dutenez, Jaurlaritzak Elkarrizketa Sozialerako Mahaiari egindako proposamenaren berri izan dute, bide ez ofizialetik. Jaurlaritza bera, Confebask, CCOO eta UGT daude mahai horretan.

Proposamenean, sindikatuen arabera, Jaurlaritzak lan-hitzarmenak CCOOrekin eta UGTrekin sinatzea proposatzen du. Sindikatu horiek langileen % 29,74 besterik ez dute ordezkatzen EAEn, eta ELAk eta LABek, langileen % 59,2. Hori dela eta, gehiengo sindikalari "sabotajea" egin nahi diotela uste dute.

Horren aurrean, Eusko Jaurlaritzaren helburua hau dela uste dute: "Patronala egoera ezin hobean uztea negoziazio kolektiboan: gehiengoei muzin egiteko arazorik gabe, bere mintzakideak aukeratu ahal izango ditu akordio eroso eta merkeak egiteko langile klasea pobretzea beste helbururik ez duen bidean aurrera egin ahal izateko".

Era berean, ELAk eta LABek Jaurlaritzaren jarrera salatu dute "argi eta garbi egiten duelako patronalaren interesen alde; eta euskal langileen erabakiak gutxiesten dituelako".

Horregatik guztiagatik, sindikatuek Toña sailburua kargugabetzea eskatu dute.

Jaurlaritzaren erantzuna

Sindikatuen akusazioen ostean, Eusko Jaurlaritzak ohar bat publikatu du, eta, horretan, argitu du proposamen hura jasotzen duen txostena "lanerako zirriborro bat" dela, eta, horregatik, "ekarpenetarako irekita" dagoela.

Nolanahi ere, Enplegu Sailaren esanetan, testuak "langileen baldintzak ikertzea dakarren egoera desblokeatzea" du helburu.

Toña sailburuaren Sailak deia egin die ELAri eta LABi "elkarrizketa mahaian parte hartzeko", "ekarpenak eta proposamenak egin ditzaten".

Horren ildotik, Jaurlaritzak konpromisoa agertu du "eragile sozial guztiekin lan egiteko eta proposamen guztiak aztertzeko".