4.200 hautagai, 740 irakasle postuetarako Lan Eskaintza Publikoan

4.200 pertsona baino gehiagok egin dute gaur goizean Barakaldon, BECen, Haur eta Lehen Hezkuntzako irakasle izateko Eusko Jaurlaritzak deitutako Lan Eskaintza Publikoaren lehen azterketa. 740 lanpostu daude jokoan.

Gasteizko Exekutiboak azaldu duenez, lehen proba honen azterketa 08:30ean hasi da. 4.207 hautagai aurkeztu dira lehen azterketa honetara: % 79 emakumeak dira, eta % 21, gizonak. 25 eta 35 urte artekoak dira gehienak, Haur eta Lehen Hezkuntzan espezializatutakoak.

Lurraldez lurralde, % 47 bizkaitarrak dira, % 36 gipuzkoarrak, % 12 arabarrak, eta % 5 beste nonbaitetik etorri da.

Olatz Garamendi Eusko Jaurlaritzako Administrazio eta Zerbitzuetako sailburuordeak nabarmendu duenaren arabera, "kalitatezko hezkuntzaren eta gure gazteen alde" Exekutiboak egindako inbertsioaren "apustu garbia" da LEP hau. "Irakasleak gure hezkuntza sistemaren euskarriak dira", berretsi du Garamendik. Deialdiaren xedea "irakaslegoaren egonkortasuna lortzea da, eta hori eskola publikoei dagokie", jarraitu du. Halaber, "lan egonkorra eta kalitatezkoa" erdietsi nahi dute.

Lan Eskaintza Publikoak honako lanpostu hauek eskainiko ditu: 227 Haur Hezkuntzan, 252 Lehen Hezkuntzan, 57 Ingelesezko Irakaskuntzan, 37 Gorputz Hezkuntzan, 36 Musikan, 105 Hezkuntza Berezian eta Pedagogia Terapeutikoan, 26 Hezkuntza Berezian, Entzumenean eta Hizkuntzan.

Hautagaiek bi ordu izan dituzte proposatutako gaien artean aukeratutako bat garatzeko, espezialitate bakoitzaren ikasgai-zerrendatik epaimahaiak zoriz ateratakoak.

Bigarren zatian hiru ordu izango dituzte gehienez, eta proba praktikoa izango da. Heziketa zientifikoaz gain, espezialitate bakoitzari dagozkion gaitasun teknikoak erakutsi beharko dituzte hautagaiek.