Eusko Jaurlaritzak 300 plaza berri atera ditu Ertzaintzaren 27. promoziorako

Eusko Jaurlaritzako Segurtasun Sailak lan-eskaintza publikoko 300 plaza berri atera ditu Ertzaintzaren 27. Promoziorako. 1.700 plaza aterako ditu 2020. urtera bitartean.

Ostiral honetan eman ditu jakitera deialdiaren oinarriak Estefanía Beltrán de Heredia Segurtasun sailburuak, Malentxo Arruabarrena Polizia eta Larrialdietako Euskal Akademiako zuzendariarekin batera.

Eskabideak egiteko epea abenduaren 18tik 2018ko urtarrilaren 30era bitartean egongo da zabalik.

Sailburuaren hitzetan, Ertzaintzaren belaunaldi-berrikuntza prozesua ordenatu eta planifikatu dute, "Euskal Autonomia Erkidegoan segurtasun publikoa bermatuko duten 8.000 ertzain izateko".

2014tik lau deialdi egin dira, eta 670 ertzain aukeratu eta trebatu dituzte; legealdia bukatu arte (2020ra arte, alegia), Eusko Jaurlaritzak beste 1.700 plaza deitzea aurreikusten du, batez ere, erretiroa hartzen dutenak ordezkatzeko.

Datorren urtean beste 400 plaza aterako dituzte; 2019an, 500; eta 2020an, beste 500.