Zezenketei buruzko galdeketa egingo dute Donostian

Donostiako Udalak zezenketei buruzko galdeketa egingo du uda ostean, segur aski, irailean. 2016ko Aste Nagusirako hitz emandako zezenketei, beraz, ez die eragingo.

Eneko Goia Donostiako alkateak egin du iragarpena, zezenketen gaia Donostiako Udalean dagokion batzordean jorratu ondoren.

Udalak deituko du galdeketa, "Donostia antitaurina orain!" plataformak eskatuta. Aipaturiko plataformak 10.000 sinadura inguru aurkeztu zituen zezenketei buruzko galdeketa eskatzeko; hain zuzen ere, Donostian galdeketa bat deitzeko beharrezkoak diren sinadurak baino gehiago. Udal legediaren arabera, 16 urtetik gorako donostiarren % 5en babesa behar da horrelakoak bideratzeko.

Goiak azaldu duenez, baliteke udal araudiak ezarritako epeak agortzea (are gehiago, aukera hori lehen aldiz erabiliko dela kontuan hartuta) eta galdeketa irailean egitea.

Hala eta guztiz ere, litekeena da galdeketa hori atzeratzea; batetik, aurreko legegintzaldian onartutako kontsulta araudiaren aurka helegitea jarri zuelako Estatuak, eta EAEko hauteskundeak izango direlako tartean.