Gizartea -
Liga txapeldunak
27.000 sinaduratik gora, Athleticeko neskak gabarran atera daitezen
Liga titulua eskuratu ostean, sinadura bilketa 16.000tik 27.000ra igo da.
agentziak | erredakzioa
Athleticeko neskek Liga txapelketa eskuratu ostean gabarran atera daitezen abian jarritako ekimenak 27.000tik gora lagunen sinadura bildu du, titulua eskuratu ostean gorakada nabarmena izan eta gero.
Maiatzaren 29an Change.org-en jarritako eskaerak 15.000 sinadura jaso zituen larunbaterako, eta 27.000ra iritsi da txapelketa erdietsi ondoren.
Gabarraren sinbologia kontuan hartuta, eskari hau egin zuen Txema Olletak bertan: "Emakumeen eskubideak eta erabateko berdintasuna defendatu nahi badute benetan, aurten, edo beste edozein urtetan, Athleticeko neskek Liga irabazten badute, gabarra ateratzea exijitzen diogu klubari".
"Borrokalari hauen adorea ez da gizonezkoena baino txikiagoa, nahiz eta askoz ere gutxiago kobratu. Eman diezaiogun balioa emakumeen kirolari. Eska dezagun gure sinadurekin Athleticeko neskak gabarran ateratzea. Merezi dute!", idatzi zuen Josu Urrutia Athletic Clubeko presidenteari zuzendutako eskaeran.
EH Bilduk eta Ganemosek ere eskatu dute nesken titulua ospatzeko gabarra erabiltzea, mutilen taldearen pare jartzeko.
Juan Maria Aburto Bilboko alkatearen esanetan, gabarra Athletici dagokio, eta Udalak gizonezkoek irabazten dutenean egiten dituen ekitaldi berdinak antolatuko ditu neskek lortutakoa ospatzeko.
