Gizartea -
Indarkeria Matxista
Epailearen esanetara, bikotekide ohiari eraso egin nahi zion gizona
Bilboko polizia-etxean atxilotuta egon ondoren, epailearen esanetara jarri dute igande honetan.
Agentziak | erredakzioa
Larunbatean bikotekide ohiari suzko arma batekin eraso egin nahi izan zion gizona epailearen aurrera eraman dute igande honetan.
Bilboko Udaltzaingoaren arabera, 38 urteko gizona larunbat honetan atxilotu zuten, 13:30ean, Bilboko Posta kalean, Zazpikaleetan. Minutu batzuk lehenago, udaltzainek familiako baten abisu bat jaso zuten gizonaren asmoen berri emateko, eta bere onetik aterata zegoela esateko.
Handik gutxira atxilotu zuen Udaltzaingoak, ustez bikotekide ohiaren etxebizitzara zihoanean.
Atxilotuak suzko arma bat eta munizioa zeramatzan gerriko poltsa batean. Horren aurrean, atxilotu eta Miribillako polizia-etxera eraman zuten.
