Istripua izan eta ertzain bat harrapatzen saiatzeagatik atxilotu dute

Galdakaoko Ertzain-etxeko agenteek 44 urteko gizonezko bat atxilotu zuten ostegun arratsaldean agintaritzaren agente baten aurkako delituagatik. Atxilotua lehendabizi trafiko istripu batean egon zen nahasita, eta, ondoren, istripua izandako lekutik ihes egiten saiatu zen bere ibilgailuan, baina atzitu egin zuten jazarpen baten ostean. Bi agentek zauriak izan zituzten, horietako batek autoak jota, eta osasun-zentro batean artatu behar izan zituzten.

Segurtasun sailak ohar baten bidez jakinarazi duenez, arratsaldeko zortziak aldera, patruila batek bi ibilgailuk (ondorio larririk gabe) elkar jo zutela ikusi zuen Galdakaoko Juan Bautista Uriarte etorbidean.

Istripuaren lekura bertaratuta, ezbeharra eragin zuen autoko gidaria bestea beldurtu nahian zebilela ikusi zuten agenteek, eta beraiek hain zeudela hura jotzen saiatzeraino iritsi zen. Ertzainek jarrera hura eragotzi zuten, eta hori dela eta mehatxuak jaso zituzten.

Une jakin batean, bere autora joan zen adiskidetasunezko istripu-aitorpena egiteko dokumentazio bila, baina une hori baliatu zuen ibilgailua martxan jarri eta ertzainetako bat harrapatzen saiatzeko. Ertzainak aldendu egin behar izan zuen, baina aldakan eta hanka batean kolpeak izan zituen.

Jazarpen baten ostean, ertzainek gidaria geldiarazi zuten. Orduan, haien aurkako jarrera bortitza eta erresistentzia azaldu zuen (ertzainetako bat zauritu egin zen eskuan eta aurpegian), eta heriotza-mehatxuak jaurti zizkien. Azkenean, atxilotu egin zuten atentatu delitua leporatuta.

Ibilgailuan 12 zentimetroko xafladun labana bat aurkitu zuten ezkutatuta. Behin Ertzain-etxean, gida-baimena iraungita zuela ere egiaztatu zuten.

Ertzain biek osasun-laguntza jaso behar izan zuten.