Sute batek kalte handiak eragin ditu Altsasuko lantegi batean

Sute batek kalte handiak eragin ditu Altsasuko (Nafarroa) Ibarrea industrialdean dagoen lantegi batean. Garai batean, Perfo Sistem koltxoi fabrika izandakoaren eraikinean izan da sutea, Euskadi Irratiak jakitera eman duenez.

Altsasuko suhiltzaileez gain, Lizarrako suhiltzaileak eta Arabatik Aguraingoak ere gerturatu behar izan dira. Bi ordu baino gehiago behar izan dituzte sua kontrolatzeko.

Nafarroako Gobernuak agiri batean jakitera eman duenez, lantegiko egiturari kalte egin dio suak, eta sabaiko zati bat behera etorri da.

Nafarroako larrialdi zerbitzuak abisua 19:30ean jaso zuen atzo.

Lantegi barruan koltxoiak eta beste material batzuk zeuden, baita zaborrak ere. Sugarrak oso azkar zabaltzen lagundu du horrek. Nahiz eta inguruetan enpresak egon, Sunsundegui esaterako, sutea hedatzeko arriskurik ez da izan.

Sutea 21:30 aldera kontrolatzea lortu zuten. Arabako eta Lizarrako suhiltzaileek alde egin zuten, baina Altsasu eta Cordovillako baliabideek hondakinak kentzen eta hozten jarraitu dute.