Gizartea -
Istripua
Erreskatatu dute Zestoako kobazulo batean zauritutako espeleologoa
Larunbat arratsaldeaz gero harrapatuta zegoen kobazuloan, eta igande goizean ateratzea lortu dute.
Agentziak | Erredakzioa
Erreskatatu dute larunbat arratsaldean Zestoako Hamabi Iturri kobazuloan istripua izan zuen 43 urteko espeleologo zestoarra. Donostiako Ospitalera eraman dute.
Segurtasun Sailaren arabera, larrialdi zerbitzuek eta Ertzaintzaren Zaintza eta Erreskaterako Unitateak gau osoa pasa dute lanean, zauritua kobazulotik ateratzeko. Igande goizeko 08:10ean atera dute.
Larunbat arratsaldean izan zuen ezbeharra Zestoako gizon honek, eta berarekin zegoen espeleologo taldeak eman zien abisua larrialdi zerbitzuei.
Kobazuloko gune estu batean izan zuen istripua, eta hankatan hausturak izan zituenez, erreskatea zaila izan da.
DYA eta Gurutze Gorriko Logistika eta Babaserako Unitateek alberge bat antolatu dute kobazuloaren sarreran, eta gau osoa egon dira zaurituari laguntzen. Igande goizean atera ahal izan dute, eta ospitalera eraman dute.
Hiru eskalatzaile erreskatatu dituzte Ibarrangelun
Hiru eskalatzaile erreskatatu behar izan zituzten, horietako bat zaurituta, larunbat arratsaldean Ogoño lurmuturreko hormatik. Lagako hondartza gainean (Ibarrangelu) zeuden, Segurtasun Sailaren arabera.
