Gizartea -
Epaia
Karrantzako Mindaren konkurtsoa 'ustekabekoa' izan zela dio epaileak
Bilboko 2. Merkataritza Auzitegiak akusatuak absolbitu egin ditu, beren kudeaketarekin sozietate publikoaren porrota larriagotu ez zutela argudiatuta.
AGENTZIAK | ERREDAKZIOA
Karrantzako Minda plantaren konkurtsoa eta likidazioa "ustekabekoa" izan zela ebatzi du Bilboko Merkataritza arloko 2. epaitegiak. Karrantzako Minda sozietate publikoa diru publikoarekin sortu zuten, 10 milioi euroko diru laguntzak jaso zituen, baina proiektua amaitu aurretik hondoa jo zuen.
Konkurtsoaren kalifikazioagatik kaltetutako 10 pertsonak eta beste hiru lagunek deklaratu zuten epaiketan. Auzian nahastuta zeuden, besteak beste, Martin Ascasibar Eusko Jaurlaritzako Nekazaritza Saileko Berrikuntza zuzendaria ohia, Jose Luis Portillo Karrantzako alkate ohia eta Jose Ignacio Muro zinegotzi ohia.
Gaur argitaratutako epaian irakur daitekeenez, epaileak atzera bota ditu Fiskaltzak, Estatuaren Abokatutzak eta konkurtsoko administratzaileak egindako zigor eskaerak, eta akusatuak absolbitu egin ditu.
Aldeek 20 eguneko epea dute Bizkaiko Auzitegian apelazio helegitea aurkezteko.
Karrantzako Minda plantaren merkataritza auziari buruzkoa da gaurko epaia; izan ere, zigor arloari dagokiona Balmasedako epaitegiaren esku dago —11 pertsona daude inputatuta—.
