Txirrindulari bat koman da, furgoneta batek harrapatu ondoren Bilbon

Ostiralean, martxoak 24, furgoneta batek bizikletan zihoan emakume bat harrapatu zuen Bilbon. Bere alabarekin bidegorri batetik zihoan txirrindularia koman da, astelehen honetan Biziz Bizi Bilboko Hiri Txirrindularien Elkarteak ohar baten bidez jakitera eman duenez.

Biziz Bizi elkarteak gogoratu duenez, ostiralean jazo zen ezbeharra. Ezustean bidegorrira igo zen furgoneta batek bere alabarekin zihoan emakumea harrapatu zuen, San Inazion.

Txirrindularien elkarteak azaldu duenez, emakumea koman da, eta, soilik hiru egun igaro badira ere, “beste istripu baten berri izan dugu, kasu honetan Zunzunegi kalean. Garaje batetik ateratzen ari zen auto batek bidegorritik zihoan txirrindulari bat kolpatu du, eta, ondorioz, tranbiaren bidean erori da”. Elkarteak nabarmendu duenez, gidariak autoa gelditzeko aukera izan du.

Bi txirrindulari horien harrapaketen aurrean, Biziz Bizik elkarretaratzea deitu du martxoaren 30erako. 19:00etatik aurrera, Bilboko Udaletxean, “haserrea adierazi eta trafikoaren baretzearen aldarrikapena” egingo dute. Ildo horretatik, Udal ordezkariek segurtasun arazo horren inguruan izandako “interes falta” salatu dute, eta egunero bizikletan ibiltzen diren pertsonek babes gehiago merezi dutela esan dute.

“Bidegorri hitza segurtasun handiaren sinonimoa izan beharko luke, bertatik dabiltzan pertsonek hala dela pentsatzen dutelako. Alabaina, argi dago errepidean bezala bizitza arriskuan jartzen duzula”, salatu du Bizi Bizik.