Gizartea -
Nafarroa
Haurdun dagoen gidari batek positibo eman du kokainan, Urdazubin
Akizeko bizilagunari (25 urte ditu) arau-hauste larria egitea egotzi diote, eta 1.000 euroko isuna eta 6 puntu kentzea dakar horrek.
Agentziak | Erredakzioa
Foruzaingoak Frantziako ibilgailu bat geldiarazi du, zazpi hilabeteko haurdun dagoen emakume gidariak kokainan positibo eman duelako, eta kopilotu zihoan bikotekideak ezin zuelako gidatu, gidabaimenean punturik ez duelako.
Astelehen arratsaldean harrapatu zuten emakumea, Foruzaingoa Datxarinean (Urdazubi) egiten ari zen ohiko kontrol batean, N-121-B errepidean, Iruña eta Frantzia Baztandik lotzen dituen errepidean, 72. kilometroan, Foruzaingoak jakitera eman duenez.
Agenteek Frantziako matrikula zuen auto bat geldiarazi zuten, eta Bide-segurtasunari buruzko Legearen kontrako arau-hauste larria egitea leporatu diote gidariari (Akizeko 25 urteko emakume bat), droga-proban positibo emateagatik; 1.000 euroko isuna eta 6 puntu kentzea dakar horrek.
Haren bikotekideak ibilgailuaren ardura hartu nahi zuela ikusi zutenean, ezin duela autorik gidatu baieztatu zuten foruzainek, ez baitu punturik gidabaimenean.
Ondorioz, agenteek ibilgailua geldiarazi zuten, eta aurrera egin aurretik ordaindu beharko dute isuna, arau-haustea egin den herrialdekoak ez direlako.