Gizartea -
'Rimet' operazioa
Behin-behineko espetxealdia ezarri diote Roselli, dirua zuritzea egotzita
Probak ezabatzeko, delitu gehiago egiteko eta ihes egiteko arriskua dagoela ikusi du Carmen Lamela Auzitegi Nazionaleko epaileak. Joan Besoli ere espetxera bidali du.
Agentziak | Erredakzioa
Carmen Lamela Auzitegi Nazionaleko epaileak behin-behineko kartzela-zigorra ezarri dio Sandro Rosell Bartzelona futbol taldeko presidente ohiari, bermerik gabe, dirua zuritzea leporatuta. Antza denez, Brasilgo futbol selekzioaren irudi eskubideengatik irabazitako 6,5 milioi euro ezkutatu zituen. Gauzak horrela, probak ezabatzeko, delitu gehiago egiteko eta ihes egiteko arriskua dagoela ikusi du epaileak.
Asteartean, ‘Rimet’ polizia-operazioaren baitan atxilotutako pertsonek deklaratu ostean hartu du erabakia epaileak. Era berean, Joan Besoli abokatu eta politikariari behin-behineko espetxealdia ezarri dio, dirua zuritzeko erabili zituzten enpresak berak sortu zituela leporatuta.
Brasilgo selekzioaren irudi eskubideengatik irabazitako 15 milioi euro Kaiman uharteetako enpresa arabiar bati eman zizkioten. Antza denez, Ricardo Teixeira Brasilgo selekzioko presidente ohiak 8,3 milioi euro jaso zituen.
Auzitegi Nazionaleko epailearen ustez, legez kanpoko komisioetan lortzen zuten dirua zuritzen zuen talde baten kide zen Rosell. Carmen Lamelak aske utzi ditu joan den asteartean atxilotutako beste hiru lagunak.
Marta Pineda (Rosellen emaztea) etxea miatu ondoren utzi zuten aske. Bestalde, Andreu Ramos Rosellen izen-mailegatzailea eta Shahe Ohannessian bazkide ohia ostegun honetan askatu dituzte.
Dena dela, kautelazko neurriak ezarri dizkie biei: Espainiatik ateratzeko debekuaz gain, epailearen aurrean aurkeztu beharra izango dute hilean birritan.
