Gizartea -
Futbola
Guardia Zibila Lodosako zelaira joan da partidu batean istiluak izan ostean
Norgehiagokaren une batean, "liskar txiki bat" sortu da jokalari batzuen artean, eta "ikusle batzuek" hesiaren gainetik salto egin dute eta zelaian sartu dira.
agentziak | erredakzioa
Guardia Zibilak gazteen mailako futbol partidu batean esku hartu behar izan zuen atzo Lodosan (Nafarroa), ordena publikoaren aurkako gertaerak izan ondoren, baina ez zuen inor atxilotu, ezta salatu ere.
Atzo, igandea, hiru guardia zibil bertaratu ziren Lodosako futbol zelaira, Lodosa eta Corellano taldeen arteko partidu batean istiluak izan zirela jakin eta gero.
Guardia zibilak zelaira heldu zirenean, "giroa berotuta" ikusi zuten, erakunde armatuak berak ohar baten bidez zabaldu duenez.
Hala, norgehiagokaren une batean, "liskar txiki bat" sortu zen zenbait jokalariren artean, eta "ikusle batzuek" hesiaren gainetik salto egin zuten eta zelaian sartu ziren, baina futbolariengana, taldeko kideengana eta epaileengana heldu baino lehen geldiarazi zituzten guardia zibilek.
Ondoren, berriz ere geldiarazi behar izan zuten partidua, epailearen laguntzaileri ur botila bat jaurti ostean. Ezin izan zuten erasotzailea identifikatu.
Partidua liskar gehiagorik gabe bukatu zen, Guardia Zibilaren arabera. Gainera, horren esanetan, guardia zibilak ez ziren epaileak deituta bertaratu.