Gizartea -
ERREGETAKO LOTERIA 2018
Erregetako loteriak 700 milioi euro banatuko ditu
Larunbat honetan egingo da zozketa, 12:00etatik aurrera. 0 zenbakia da lehen sarian gehien errepikatu den bukaera; 21 aldiz atera da guztira.
AGENTZIAK | ERREDAKZIOA
Erregetako loteriak 700 milioi euro banatuko ditu guztira, hau da, iaz baino 70 milioi gehiago. Zozketa larunbat honetan, urtarrilak 6, egingo da, 12:00etan, Avilako Lienzo Norte Erakusketa eta Biltzar Jauregian.
Aurten lehen sariak 2.000.000 euro banatuko ditu serie bakoitzeko, bigarren sariak 750.000 euro eta hirugarren sariak 250.000 euro. Zozketaren billeteen prezioa 20 eurokoa da eta urtarrilaren 5ean, zozketaren bezperan, egiten da salmentarik handiena.
0 zenbakia da lehen sariaren bukaerarik gogokoena; izan ere, 21 aldiz atera da guztira. Gehien egokitu den hurrengo zenbakia 7a da, 14 aldiz aterata; eta 9a, 13 aldiz aterata.
Probintziei dagokienez, Madril eta Bartzelona dira lehen sari gehien jaso dituztenak, 41 eta 35 aldiz tokatu baitzaie, hurrenez hurren.
Neguko zozketa
Hurrengo zozketa Negukoa izango da, 2018ko urtarrilaren 13an, 13:00etan, Loteriako Aretoan egingo dena.
Guztira, 105.000.000 euro banatuko ditu eta hauek izango dira sari nabarmenenak: 15.000.000 euroko sari berezia dezimo bakarrari, 1.300.000 euroko lehen saria serie bakoitzeko eta 250.000 euroko bigarren saria serie bakoitzeko.
