Gazte batek bi gizon zauritu ditu Arrasaten, aitzurraz eraso eginda

Gazte batek (25 urte ditu) bi gizonezkori eraso egin die aitzurraz astelehen honetan, Arrasaten (Gipuzkoa).

Gertaera 09:00ak aldera izan da, gazte batek lorezaintzako aitzur batez zauritu ditu bi pertsona, Zarugalde kalean. Biktimetako batek traumatismo bat du buruan, belarritik gertu, eta besteak ere traumatismo bat du, larritasun gutxiagokoa.

Dirudienez, geroago zaurituetako baten atzetik joan da, Goi Debako ospitaleraino, eta bertan pertsona gehiagori eraso egiten saiatu da.

Erasotzailea atxilotu eta Bergarako Ertzaintzaren polizia-etxera eraman dute; astearte honetan utziko dute epailearen esku. Oraingoz ez dute erasoaren arrazoirik jakin.