Haizeagatik abisu horia ezarri dute igandera arte

Haizeagatik igandera arte abisu horia ezarri du Eusko Jaurlaritzako Segurtasun Sailak. Hego-mendebaldeko haize-boladek 110-120 kilometro orduko abiadura gainditzea espero da mendebaldeko mendialdean.

Larunbatean, abisu horia indarrean izango da gauerditik goizeko 09:00ak arte. Hego-haize boladek 100 kilometro orduko abiadura gainditzea espero da mendialdean. Bitartean, kostaldean 60 kilometro orduko boladak izango dira.

Igandean, arriskutsuak ez diren tokietan hego-mendebaldeko boladek 80 kilometro orduko abiadura gaindituko dute. Leku arriskutsuetan, mendialdean 110-120 kilometro orduko abiadura gaindituko dute.

Igande arratsaldean haizeak mendebaldetik joko du, 100 kilometro arteko boladekin.

Bolada bortitzak

Azken orduetan, Oizen 115,2 kilometro orduko boladak izan dira, 112,1 kilometrokoak Matxitxakon eta 107,9 kilometrokoak Urduñan.

Euskalmeten iragarpenaren arabera, larunbatean zerua estalirik izango da goizean, eta euria egingo du. Hala ere, arratsaldean atertuko du, baina txingor ekaitzak bota ditzake.

Igandean, laino asko espero dira, prezipitazio ahulekin, sarriago eguneko azken orduetan. Bestalde, tenperatura maximoek behera egingo dute.