Jose Cousoren familia eta lagunak, justizia eske, haren hilketaren 15. urteurrenean

Jose Couso gerra-kamerariaren heriotzaren 15. urteurrenean, hura gogoratzeko elkarretaratzea egin dute igande honetan AEBetako enbaxada parean, Madrilen, urtero bezala, Jose Cousoren Anai-arrebak, Lagunak eta Lankideak Elkarteak antolatuta. Cousoren hilketa argitzeko prozedura judiziala ez ixteko aldarrikatu dute bertan bildutakoek, PPren Gobernuak sustatutako Justizia Unibertsalaren legearen ondorioz, familiaren salaketa artxibatu egin zutelako.

Komunikabideen aurrean David Couso anaiak azaldu du aldarrikapenari eutsi diotela, "etxean geratuta, ez baitugu ezer lortuko". "Apirilaren 8ko goiz hartan, AEBek Al Jazeerako egoitza eta Palestina Hotelaren 15. solairua bonbardatu zituzten, eta hemen gaude gogorarazteko familia eta herritarrak daudela, haiek emandako bertsioa sinestu ezinda", ohartarazi du.

"15 urte Cousorekin, ikerketa eta justizia" lemapean egin dute ekitaldia, eta kamerariaren ama den Maribel Permuyk, Cousoren anai-arrebek eta lankideek parte hartu dute. Samba da Rua batukadak ekitaldia girotu du.

Prozesu judizialari dagokionez, Auzitegi Konstituzionalean familiak jarritako helegitearen ebazpenaren zain daude. Cousoren amak adierazi duenez, "justizia" eskatuko die epaileei, eta "Cousoren heriotzaren erantzule diren hiru estatubatuarrak akusatuen eserlekuetan jesartzeko: tiroa botatzeko agindua eman zuena, erabaki hori babestu zuena, eta tiroa bota zuena", hain zuzen ere.

AEBetako enbaxadaren aurrealdean bildu dira, "haiek izan baitziren nire semea hil zutenak", Cousoren amaren hitzetan. "Militar espainiar batek kazetari amerikar bat hilko izan balu, hurrengo egunean izango zuketen horren burua Etxe Zurian", deitoratu du.