Sanduzelaiko jaietan izandako eraso homofobo bat salatu du Iruñeko Udalak

Iruñeko Udalak atzo, ostirala, Sanduzelai auzoko jaietan gertatutako eraso homofobo bat salatu du gaur. Horrez gain, eraso hori jasan duten pertsonei eta "noizbait jazarrita eta beldurtuta sentitu direnei babesa eta elkartasuna" adierazi die.

Halaber, halako gertaerak salatzera animatu du gizartea "jarrera horiek zigorrik gabe gera ez daitezen". Erasoen biktimak babestu eta erasotzaileak gaitzesteko Sanduzelaiko festa batzordeak eta LGTBI mugimenduak gaur 20:00etan Patinodromoan deitutako bilkuran parte hartzeko deia egin du.

"Iruñean gertatzen den edozein eraso, indarkeria edo jarrera sexista eta LGTBIfobiko" baztertu eta salatu dute Geroa Bai, EH Bildu, PSN, Aranzadi eta Izquierda-Ezkerra alderdiek ohar batean. Era berean, "sexu eta genero aniztasunarekin zerikusia duten erasoak deuseztatzeko konpromisoa hartu dute, LGTBI komunitatearen segurtasuna hobetzeaz" gain. UPN abstenitu egin da bozketan.

Zentzu horretan, Udalak dei egin die herritarrei "indarkeriaren eta eraso sexista eta LGTBIfobikoen aurrean geldirik egon ez daitezen". LGTBI pertsonek "harremanen, gorputzaren eta sexualitatearen inguruan" erabakitzeko duten eskubidea aldarrikatu dute.

"Ez du edozerk balio, ezta festetan ere: pertsona guztiok eskubidea dugu gure hirian bizi, ibili eta maitatzeko, gure giza eskubideak segurtasunez eta askatasunez errespetatzen direla bermatuta", azpimarratu du Udalak.