Bi pertsona larri zauritu dira Nafarroako Unibertsitatean, zuhaitz bat erori ondoren

Gutxienez sei pertsona zauritu dira, horietako bi larri, Nafarroako Unibertsitatearen Iruñeko campusean, sekuoia baten adar handi bat gainean erorita.

Nafarroako Gobernuak jakitera eman duenez, gertakaria arratsaldean jazo da 16:45 aldera, haize-bolada bortitzak izan direnean. 10-12 pertsona aparkalekuan ziren, Unibertsitateko jantokitik atera ondoren.

Unibertsitateak antolatutako ekitaldira batera joan dira, eta campusean jan dute.

Sekuoia luze baten adar handi bat hautsi eta pertsonen gainean erori da. Zauritu guztiak Alacantekoak dira.

Bi pertsonak zauri larriak dituzte: garezurreko traumatismoak eta lesioak sorbaldan eta bizkarretan. Nafarroako Ospitalera eraman behar izan dituzte.

Cordovillako suhiltzaileek bi biktima erreskatatu dituzte. Anbulantzian Nafarroako Ospitalera eraman dituzte larri. Era berean, anbulantziek zauritu arinak ospitalera eraman dituzte.

Bestalde, lepoan kolpe bat zuen zauritu arin bat autoan eraman dute Nafarroako Unibertsitatea Klinikara.

30 urteko gizon bat oso larri dago zainketa berezien unitatean. 42 urteko gizon bat larri zaurituta larrialdietako behaketan dute. Ebakuntza egin behar diote.

Gainera, 43 urteko gizon bat, 33 urteko emakume bat, 44 urteko emakume bat eta 48 urteko gizon bat Nafarroako Ospitalera eraman dituzte.

Taldea Kataluniatik Iruñera heldu berria zen, Nafarroako Unibertsitatearen bilera zientifiko batean parte hartzeko.

Cordovillako suhiltzaileak bertaratu dira, eta sekuoia kimatu eta adarra kendu dute. Adarra aparkalekuko autoen gainean erori da.

Suhiltzaileak adarra kendu dutenean, pertsonak maletategietatik bagajea atera ahal izan dute, ondoren hotelera joateko.

Bestalde, arratsaldeko lehen orduan izan diren haize-bolada bortitzek zuhaitzak bota dituzte Iruñeko beste toki batzuetan eta gertuko herrietan, baina ez da inor zauritu.