Gizartea -
Istripua
Lau lagun zauritu dira Zestoan, bi autok aurrez aurre talka eginda
Zaurituak Donostia Ospitalera eraman dituzte, eta horietako bat larri dago; autoan harrapatuta geratu da, eta suhiltzaileek erreskatatu behar izan dute.
AGENTZIAK | ERREDAKZIOA
Lau pertsona zauritu dira arratsalde honetan Zestoan izan den istripuan, Segurtasun Sailak jakinarazi duenez.
Oraindik argitu gabe dauden arrazoiak tarteko, bi autok aurrez aurre egin dute talka. Ezbeharraren ondorioz, ibilgailu berean zihoazen lau lagunak zauritu dira, eta Donostia Ospitalera eraman dituzte guztiak.
Gidariak ditu zauri larrienak. Auto barruan harrapatuta geratu da, eta suhiltzaileek erreskatatu behar izan dute.
Istripua 14:30 inguruan gertatu da, eta errepidea bi noranzkoetan itxi egin behar izan dute ezbeharraren ondorioz. Pilaketa handiak izan dira, 16:30 arte.