Sua itzaltzeko operatiboaren arduradunek gaur goizean aztertuko dute egoera kontrol-fasera pasatu behar den ala ez erabakitzeko.
Egonkortuta daude joan den asteartean Leireko mendilerroan, Tafallan eta Olletan piztutako suteak, eta azken orduetan ez da berriro suterik agertu.
Nafarroako Suhiltzaile Zerbitzuko parkeetako erretenak gauez egon dira suak kaltetutako guneetan, berriz agertu ez daitezen, Foru Gobernuak jakitera eman duenez.
Sua itzaltzeko operatiboaren arduradunek ostiral goizean ebaluatuko dute egoera kontrol-fasera pasatu behar den ala ez erabakitzeko.
Halaber, Herrizaingo Zuzendaritza Nagusia Baso Suteen Arriskurako Larrialdi Planaren 2. maila desaktibatzeko aukera aztertzen ari da.
Nafarroako Gobernuko helikopteroak goizean goiz itzuli dira sugarrak kaltetutako lekuetara ura berriro deskargatzeko eta egoera zein den airetik ezagutzeko.
Erretenek su hartu duten lurren perimetroa zaintzen dute, eta motzondo eta txingar ketsuak itzaltzen eta freskatzen jarraitzen dute.
Bestalde, Lizarrako eta Lodosako parkeetako suhiltzaileek zereal zelai bateko sutea itzali dute bart Laboriz gainean, Oteizaren barrutian. SOS Nafarroako larrialdiak kudeatzeko zentroari horren berri eman zioten 22:43an 112 telefonoan jasotako dei baten bidez.
Suhiltzaileek inguruko bizilagunen laguntza izan dute traktoreak ekarri baitituzte, eta sua itzalitzat jo dute 0:30ak aldera.