Mundua -
Argentina
Cristina Fernandez auzipetu dute, ustezko irregulartasunengatik
Justiziak presidente ohia auzipetzea erabaki du, legez kanpoko elkarteagatik eta iruzurrezko administrazioagatik obra publikoen kontzesioan ustezko irregulartasunak aztertzen dituen auzian.
Agentziak | Erredakzioa
Argentinako Justiziak Cristina Fernandez de Kirchner presidente ohia (2007-2015) auzipetzea erabaki du, legez kanpoko elkarteagatik eta iruzurrezko administrazioagatik, obra publikoen kontzesioan ustezko irregulartasunak aztertzen dituen auzi batean, iturri judizialek jakitera eman dutenez.
Estatuko buruzagi ohia beste auzi batean auzipetuta dago, egin zuen kudeaketan Banku Zentraleko etorkizuneko dolarrak saltzean irregulartasunengatik. Oraingo hau ustelkeria delituagatik auzipetzen duten lehen aldia da.
Agintari ohiak urrian deklaratu zuen ikertu gisa, eta espedientean Austral taldearen aldeko “abantaila esklusiboen” ustezko eskema bat ikertzen ari dira. Lazaro Baez enpresariarena da (Nestor Kirchner hildako presidente ohiaren gertuko pertsona, uneotan ustez dirua garbitzeagatik atxilotuta dago), Estatuko diru-kutxen kaltean.
Julian Ercolini epaileak Fernandezen aurka 10.000 milioi pesoko (664 milioi dolar inguru) blokeoa agindu du. Halaber, besteak beste, Baez, Julio de Vido Antolakuntza Federaleko ministro ohia eta Jose Lopez Obra Publikoetako idazkari ohia auzipetzea ere eskatu du.