Mundua -
GOI-BILERA HISTORIKOA
Apirilaren 27an bilduko dira Ipar Korea eta Hego Korea, azken 11 urteotan lehen aldiz
Bi herrialdeotako ordezkariek gaur adostu dute batzarra egitea. Apirilaren 4an zehaztuko dituzte goi-bileran landuko diren gaiak, eta hartuko diren segurtasun neurriak.
AGENTZIAK | ERREDAKZIOA
Ipar Koreako eta Hego Koreako agintariak apirilaren 27an bilduko dira, 11 urtean lehen aldiz. Gaur adostu dute goi-bilera hori egitea, bi herrialdeotako ordezkariek egin duten batzarrean.
Oraingoz, ez dute bilerari buruzko xehetasunik jakitera eman. Kim Jong-un Ipar Koreako buruzagia eta Moon Jae-in Hego Koreako presidentea Peace House izeneko pabiloian elkartuko dira, bi herrialdeak lotzen dituen mugan.
Gaurko batzarrean, bi gobernuotako goi kargudunak elkartu dira, aurrera begirako negoziazioei buruz hitz egiteko, eta datorren apirilaren 4an berriro elkartzea erabaki dute, goi-bilerako edukiak zehazteko.
Bilera amaitutakoan kaleratu duten agirian, dena dela, ez dute argitu arma nuklearrei buruz erabakirik hartu duten edo ez. Seul pozik agertu da goi-bilerarako data jartzea lortu dutelako. Hego Koreako Gobernuaren iritzian, aukera bat izan daiteke, Koreako penintsulan bakea ezartzeko.
