EAJk ekitaldi politikoa egin du Bilboko Euskalduna Jauregian uztailaren 12ko hauteskundeetarako prestatu duen programa aurkezteko.
Ekonomia suspertzea, enplegua berreskuratzea eta osasun publiko sendoa mantentzea dira EAJren helburu nagusiak, koronabirusaren pandemiak eragin duen krisi sozioekonomikoari aurre egiteko, eta hala jaso du bere hauteskunde-programan.
EAJk ekitaldi politikoa egin du Bilboko Euskalduna Jauregian uztailaren 12ko hauteskundeetarako prestatu duen programa aurkezteko. Han izan dira Iñigo Urkullu lehendakarigaia eta Andoni Ortuzar jeltzaleen buruzagia.
Koronabirusagatik hildako pertsona guztien omenez minutu bateko isilunea gorde ondoren, Iñigo Urkulluk hartu du hitza.
Pandemiak eragin duen krisi ekonomikoaren larritasunaz oraindik jabetu ez garela ohartarazi du.
“Gizarte gisa hurbiltasuna eta pultsua berreskuratu behar ditugu orain. Osasun sistema eta zerbitzu publikoak bermatu behar ditugu, eta familia zaurgarrienak babestu. Ekonomia suspertzea, enpresak babestea eta enplegua sortzea tokatzen zaigu”, esan du.
“Euskal gizartearen kezka nagusia enplegua da eta enplegua izango da gure erronka nagusia. Enplegua da integrazio sozialerako politikarik onena. Enplegurik gabe ez dago ekonomia osasuntsu eta lehiakorrik”, adierazi du.
Horrez gain, autogobernuan sakontzea ere garrantzitsutzat jo du. “Euskaldun sentitzeko modua da, gure nortasuna, gure kultura, munduaren aurrean aurkezteko modua da. Eta etorkizunari heltzeko autogobernu sendoa behar dugu”, azaldu du.
Andoni Ortuzarrek, berriz, EAJk euskal gizarteari “segurtasuna” eta “ziurtasuna” ematen diola esan du.
“Batzuen burutaldien aurrean eta besteek ondo geratzeko egiten dituzten proposamen aurrean, guk gobernu-programa sendoa eta errealista aurkeztu dugu, zorrotz beteko duguna, COVID-19aren osasun krisia eta haren ondorio ekonomikoak ahalik eta azkarren atzean uzteko”, esan du.
“83ko uholdeetatik Euskadi berri bat sortu zen bezala, krisi honetatik ere herrialde eraberritua, indartsuagoa, seguruagoa eta emankorragoa aterako da”, erantsi du.