Ezenarro: 'Aralarren alde bozkatzea bakea atzeraezin egitea da'

Aintzane Ezenarro Aralarreko legebiltzarkideak adierazi du bere alderdiaren aldeko botoek Euskadik behar duen "ezker abertzale politiko, ireki eta askotarikoaren" alde egiteko eta bakea "atzeraezina" izateko eta "atzerapausorik" ez izateko balioko dutela.

Aralarrek Bilboko Areatzan amaitu du hauteskunde-kanpaina, eta hara alderdi abertzaleko legebiltzarkideak eta hautagaiak bertaratu dira.

Bere hitzaldian, Ezenarrok esan du Aralarrek "zerotik" hasi zuela bidea, baina "motxila konbentzimendu bete". Orain, "susperraldi bidean dagoen alderdia" da eta ekarpen "erabakigarria" egin du Euskadin "itxaropena" eta "aldaketa politiko historikoa" izateko.

Legebiltzarkideak nabarmendu du Aralarrek "egintzekin" irabazi duela "sinesgarritasuna", eta beti egingo duela "ezker abertzale politiko, zibil eta askotarikoaren alde", hori baita "bide bakarra" herrialde hau "independentziara, justizia sozialera eta elkartasunera" eramateko.

Ezenarrok gogorarazi du "urrats sendoak" eman dituztela bakerako eta normalizaziorako bidean, baina ohartarazi du oraindik "asko" dagoela egiteke bakea "atzeraezina" izan dadin eta normalizazioa eraikitzeko.

Bere hitzetan, Aralarren alde bozkatzea "bakea errealitatea izatearen eta normalizazioaren eta bizikidetzaren" alde bozkatzea da.

Besteak beste, Iosu Murgia Bizkaiko ahaldun nagusigaiak ere hitz egin du ekitaldian. Hautagai abertzaleak esan du politikaria izango ez balitz, "aurreko plazan" egongo litzatekeela une honetan [Arriagan kanpatuta daudenez ari da], eta protestari horiek etorkizunean politikan egotea espero duela.

Murgia pozik agertu da "gizartearen zati bat esnatzen hasi" baita, eta gaur egungo belaunaldiak "gurasoak baino txarrago" biziko diren lehenak izango direla salatu du. Izan ere, "kaleratze merkeagoak eta etxebizitza eta enplegua lortzeko zailtasun handiagoak" izango dituzte.