Udal eta foru hauteskundeak -
Kanpainaurrea
Arnaldo Otegi: "Ez gara lokatzetan sartuko; guk proiektua dugu herri honentzat"
EH Bilduko koordinatzaile nagusiak azpimarratu duenez, "trantsizio energetikorako, hezkuntzarako, aberastasuna banatzeko edo enpresa ereduko edo etxebizitzaren inguruko eztabaida sustatu nahi dugu. Hori da gure proiektu politikoa".
EITB MEDIA
M28ko udal eta foru hauteskundeen harira, Lea-Artibaiko EH Bilduko hautagaiak aurkezteko Ondarroan egindako ekitaldi batean izan da igande honetan Arnaldo Otegi EH Bilduko koordinatzaile nagusia, eta bertan beste alderdiei ohartarazi dienez, "gu ez gara lokatzetan sartuko, gu gurera, guk proiektua dugu herri honentzat".
"Zenbaitzuk zaborretan nahi gaituzte. Interes handia daukaten gu lokatzetan sartu eta lokatzetako eztabaidak sustatzeko. Guk, aldiz, proiektua dugu herri honentzat: trantsizio energetikorako, hezkuntzarako, aberastasuna banatzeko edo enpresa ereduko edo etxebizitzaren inguruko eztabaida sustatu nahi dugu. Hori da gure proiektu politikoa", adierazi du.
Bestalde, Osakidetzaren "desegitea" salatzeko eta euskararen alde atzo euskal hiriburutan izandako manifestazioak ere aipatu ditu Otegik. "Herri hau bizirik dago. Herri hau itxaropenerako blokea eraikitzen ari da, ezker independentistaren inguruan", ondorioztatu du.