Julio Velazquez, Alaveseko entrenatzaile berria

Julio Velazquezek zuzenduko du Alaves denboraldi amaierara arte. Hala jakinarazi du klubak astearte honetan, komunikatu baten bidez. Astelehenean Jose Luis Mendilibar kargutik kentzea erabaki zuen Alavesek. 

Velazquezek taldea Lehen Mailan mantentzeko erronka izango du. Alaves Santander Ligako sailkapeneko azken postuan dago 22 punturekin, eta sei puntura du salbazioa, Cadiz jaitsiera postuetatik kanpo baitago, 28 punturekin. 

Salamancako entrenatzaileak 41 urte ditu, eta Espainiako, Portugalgo eta Italiako taldeak zuzendutakoa da. Espainian, Vila-real, Murtzia eta Betis taldeak zuzendu zituen. 

2015-2016 denboraldian Portugalgo Os Belenenses zuzendu zuen. Ondoren, Alcorconek fitxatu zuen, eta Velazquezen eskutik bi denboraldiz jarraian eutsi zion Bigarren Mailari Madrilgo taldeak. Italian esperientzia laburra izan zuen Udinense zuzenduta. Azkenik, Portugalera itzuli zen Vitoria Setubal zuzentzeko.