Fernando Llorenterentzat Athletic da faboritoa derbia irabazteko

Fernando Llorente Athleticeko jokalariak adierazi du talde zuri-gorria ikusten duela faborito igandean Realaren aurkako euskal derbia irabazteko. Llorentek argi uzti nahi izan du konfiantza handia duela bere taldearengan.

"Faboritoak garela diot nire ustez talde hobea daukagulako eta irabaztera joan behar gara hiru puntuak oso garrantzitsuak baitira UEFA postuetan egon nahi badugu", esan du Llorentek.

Realaren aurkako derbia partida beroa izango da Fernando Llorenteren ustez eta horren adibide moduan jarri ditu gaur San Mamesen ilara egiten ibili diren zaleak. Aurrelari zuri-gorriak gaineratu du "Athleticek daukan guztia" eman behar duela "sarrera lortzeko ilaran hainbat denbora pasa duten zaleei garaipena eskaintzeko".

"Jokalari handiak eta onak ditugu taldean eta astean zehar modu berezian ari gara prestatzen partida. Hau guztia berdegunean igarri egin behar da", gaineratu du Llorentek.

Realaren inguruan honakoa esan du errioxarrak: "Talde ona du Realak. Xabi Prietoren kalitatea harrigarria da, Griezmannen eta Zurutuzaren gaztetasunak indarra ematen dio taldeari eta hau guztia Joseba Llorente eta Raul Tamudo bezalako esperientziadun jokalariekin osatzen da".